Bukod sa prutas at gulay

          “Kumain ng gulay para ikaw ay maging malusog at masigla.” Bilang mga bata ay palagi tayong pinapaalalahanan na kumain ng mga masustansiyang pagkain. Habang tayo ay lumalaki, unti-unting napagtatanto ng karamihan na hindi natatanging susi ang mga nabanggit para isa isang malusog na pangangatawan. Saklaw ng pang-uring malusog ang aspeto ng kalusugang pangkaisipan na madalas, kung hindi tuluyan nang naisasantabi.

            Ang kalusugang pang-isipan ay naglalarawan ng isang antas ng kawalan ng isang diperensiyang pang-isipan. Ito rin ay maaring bigyang kahulugan sa kung ano ang tingin at nadarama ng tao tungkol sa pagharap sa mga tagumpay at kabiguan sa buhay. Masasabing ang isang taong ay mayroong positibong kalusugang pangkaisipan kung matatagumpayan niya ang mga pagbabago sa kaniyang buhay – damdamin at emosyon pati na rin ang mabuhay  na lubos sa tahanan, sa trabaho at sa komunidad.

            Sa Pilipinas, isa sa lima ka tao ang dumaranas ng isang mental condition ayon sa estadistikang ipinalabas ng Kagawaran ng Kalusugan o DOH. Tatlo sa mga nangungunang kondisyon ay ang schizophrenia, depression at anxiety. Ang nakababahala ay sa mahigit kumulang 100 milyong populasyon ng bansa ay mayroon lamang 700 na psychiatrist at kulang isang libo na psychiatric nurses

Bilang pagtugon sa kondisyon ng mental health sa bansa, tuluyan nang naisabatas ang Philippine Health Law o Republic Act 11036 matapos itong lagdaan ni Pangulong Rodrigo R. Duterte kamakailan lang. Kasama sa probisyon nito na maisama ang kalusugang pangkaisipan sa general healthcare system ng bansa. Mas malalapit na rin ang tulong para sa mga taong may mental health problem.

Paano nga ba matutulungan ang mga taong may depression? Ayon sa mga eksperto, malaking tulong sa mga taong depressed ang pagkakaroon ng “sounding board” o mga taong makikinig sa kanilang mga saloobin. Mas makakatulong, ayon kay Randy Borromeo, Assistant Executive Director ng Shepherd’s Voice RTV foundation, mas makakatulong umano ang makinig sa mga taong may depresyon kaysa sa pagbibigay payo sa kanila. Ang paraan ng paggamot ng depresyon ay nakadepende sa antas ng pagiging kumplikado nito. Minsan, bago matuklasan ng isang pasyente ang isang epektibong paraan ng paggamot, kailangan muna niyang subukan ang iba’t ibang mga pamamaraan.

Ang mga kondisyong pangkalusugan ay hindi isang biro. Hindi prutas at gulay ang kailangan nila upang maibalik ang kanilang sigla. Pag-unawa, pagmamahal at paggabay ang ating ipakita.